Þetta skrifar slökkviliðið í Osló undir mynd sem það deildi á Facebook en það er myndin sem sést hér fyrir ofan. Hún var tekin um helgina þegar slökkviliðið var sent til Grünerløkka þar sem tilkynnt hafði verið um vatnsleka.
Myndin sýnir þá sjón sem blasti við slökkviliðsmönnunum þegar þeir komu að rými í kjallara bílastæðahúss. Í rýminu er lager og stjórnbúnaður fyrir bílastæðahúsið. Eins og myndin ber með sér var mikið vatn í kjallaranum enda streymir vatnið út um skráargatið.
Mikill vatnselgur var þessa nótt en öflug lægð gekk yfir Noreg með tilheyrandi vatnsveðri. Vatn flæddi inn í kjallara í fjórum húsum í götunni og niðurföll í götunni voru frekar eins og gosbrunnar á að líta en niðurföll.
