Í sumar var átta ára stúlka að leik við Vidöstern vatnið í suðurhluta Svíþjóðar. Hún var að henda steinum og öðru út í vatnið til að sjá hversu langt hlutirnir færu. Þegar hún tók „einhverskonar prik“ upp úr vatninu hugðist hún henda því út í aftur en sá síðan að það var með skefti og virtist ryðgað.

Stúlkan, Saga Vanecek, kallaði á föður sinn sem kom og sá að hér var um ævafornan mun að ræða og hafði samband við fornleifafræðing sem sagði sverðið vera „einstakt og mjög áhugavert“.

Samkvæmt upplýsingum frá Jönköping safninu var sverðið á um hálfs meters dýpi nærri vinsælum baðstað við vatnið. Sverðið er 85 sm á lengd og mjög vel varðveitt. Leður og tré verndaði það fyrir skemmdum. Sky skýrir frá þessu.

Fornleifafræðingar gerðu leit á svæðinu í september og fundu þá fleiri gamla muni, þar á meðal nælu frá svipuðum tíma.

Mikael Nordström, starfsmaður safnsins, sagði að hugsanlega hafi svæðið verið notað til fórna.