Tilkynnt var í morgun að Denis Mukwege og Nadia Murad hljóti friðarverðlaun Nóbels árið 2018. Bæði hafa verið áberandi í baráttunni gegn kynferðisofbeldi í stríðsrekstri.

Nadia, sem er Jasídi frá Kúrdahéröðum Íraks, hefur sjálf lýst því kynferðisofbeldi sem hún varð fyrir af hálfu liðsmanna Íslamska ríkisins þegar samtökin höfðu borgina Mosul á sínu valdi.

Denis Mukwege er kvensjúkdómalæknir, fæddur í Costermansville í Kongó, og hefur eitt af hans sérsviðum verið að meðhöndla konur sem orðið hafa fyrir fólskulegu kynferðisofbeldi. Er hann sagður hafa meðhöndlað þúsundir kvenna á löngum starfsferli sínum.

Í rökstuðningi nefndarinnar kemur fram að bæði hafi Denis og Nadia skipt sköpum í baráttunni gegn þessum hrottalegu glæpum. Rúmlega 330 tilnefningar til verðlaunanna bárust í ár.