Franska lögreglan hefur hafið rannsókn á hvarfi Meng Hongwei, sem gegnt hefur embætti forseta alþjóðalögreglunnar Interpol frá árinu 2016. Breska blaðið Independent greinir frá þessu.
Hongwei er kínverskur en hans hefur verið saknað frá því í síðustu viku þegar hann yfirgaf Frakkland og fór heim til Kína. Hongwei, sem er 64 ára, er búsettur í Lyon með konu sinni og börnum en ekkert hefur spurst til hans síðan þann 29. september síðastliðinn.
Heimildarmenn innan lögreglunnar sögðu í samtali við Reuters að aðstandendur hans hefðu áhyggjur af honum. Óvanalegt væri að hann léti ekki heyra í sér eða ná í sig.
Hongwei hefur meðal annars starfað sem aðstoðarráðherra almannaöryggismála í Kína og þá hefur hann starfað fyrir stofnanir í landinu sem berjast gegn hryðjuverkaógn og fíkniefnainnflutningi svo dæmi séu tekin. Hongwei var sem fyrr kjörinn forseti Interpol árið 2016 og rennur kjörtímabil hans út árið 2020.