Vegna viðskiptastríðsins eru margir bændur í vanda með að losna við afurðir sínar og því hafa bandarísk stjórnvöld ákveðið að verja 12 milljörðum dollara til að aðstoða þá. Tíu prósent af þeirri upphæð verða notuð til að kaupa óseldar afurðir til að halda verðinu uppi. Maturinn verður síðan gefinn til hjálparstofnana um allt land sem sjá um matargjafir til fátækra.
Þetta eru auðvitað góðar fréttir fyrir þær 40 milljónir Bandaríkjamanna sem, samkvæmt opinberum tölum, hafa ekki efni á að kaupa allan þann mat sem þeir hafa þörf fyrir.
En það er ekki bara eintóm gleði hjá hjálparstofnunum með allan þennan mat því hann krefst aukinna umsvifa. Það þarf fleiri flutningabíla til að flytja hann, fleiri bílstjóra og meira geymslupláss. Hjá samtökunum Feeding America er áætlað að þetta muni kosta samtökin 300-400 milljónir dollara aukalega á þessu ári en samtökin standa fyrir matarúthlutunum á 200 stöðum í Bandaríkjunum.
