Mikil rigning hefur verið á spænsku eyjunni Mallorca undanfarnar klukkustundir og hafa fimm manns látið lífið af hennar völdum og fimm er saknað. Óveðrið hefur herjað á stærsta hluta eyjunnar. Spænsk yfirvöld segja að úrkomumagnið hafi verið gríðarlegt eða sem svarar til 220 lítra að meðaltali á hvern fermetra.

El Pais og fleiri spænskir fjölmiðlar skýra frá þessu. Verst er ástandið í bænum Sant Lorenc des Cardassar sem er að mestu undir vatni. Mikið eignatjón hefur orðið í bænum.

Björgunarmenn leita nú þeirra sem er saknað.

Ekki var búið að spá svo mikilli rigningu og kom hún yfirvöldum mjög á óvart. Áfram er spáð rigningu á Mallorca næstu daga en þó ekki í svo miklum mæli eins og undanfarnar klukkustundir.