Tansaníska kaupsýslumanninum Mohammed Dewji var rænt í Dar es Salaam, höfuðborg Tansaníu, í morgun. Hópur manna, vopnaðir byssum, tóku Dewji höndum þegar hann var á leið út af líkamsræktarstöð í borginni. Hann var einn á ferð og ekki með lífverði með sér.

Dewji hefur stundum verið nefndur yngsti milljarðamæringur Afríku en hann er 43 ára og eru eignir hans metnar á 1,5 milljarða Bandaríkjadala, rúma 170 milljarða króna á núverandi gengi. Vitni sögðu að fjórir menn hefðu verið að verki og einn þeirra hafi skotið upp í loftið þegar Dewji var dreginn inn í bíl og honum ekið á brott.

Lögreglu er ekki kunnugt um hverjir voru að verki en rannsókn á málinu stendur yfir. Ekki liggur fyrir hvort mannræningjarnir hafi krafist lausnargjalds.

Dewji er eigandi og forseti MeTL sem framleiðir allskonar varning í Afríku, þvottaefni og reiðhjól svo tvö dæmi af mörgum séu nefnd. Tuttugu og fjögur þúsund manns starfa fyrir fyrirtækið sem er það stærsta í Tansaníu.

Dewji hét því árið 2016 að láta helming auðæfa sinna renna til góðgerðarmála.