Fimm ferðamenn og fjórir nepalskir leiðsögumenn hurfu í miklu óveðri, snjóstormi, sem skall á búðum þeirra á Gurja Himal fjallinu í Himalaya í dag. Yfirvöld segja að minnst átta þeirra séu látnir.

Talsmaður yfirvalda segir að talið sé að mennirnir hafi lent í snjóstormi því tré séu brotin við tjaldbúðirnar og tjöldin hafi fallið saman og fokið. Hann sagði að úr lofti sjáist lík á dreif um búðirnar. Ekki hefur tekist að staðsetja níunda manninn. Fjallgöngumennirnir eru frá Suður-Kóreu.

Björgunarþyrla var send á vettvang í morgun til að reyna að koma mönnunum til aðstoðar en varð frá að hverfa þar sem veðrið var svo slæmt að ekki var hægt að lenda.

Guja Himal er 7.193 metra hátt og vinsælt meðal fjallgöngumanna sem klífa fjallið með aðstoð nepalskra leiðsögumanna.

Hópurinn hafði komið upp búðum við rætur fjallsins og beið átekta þar til veður yrði nógu gott til að hægt yrði að klífa fjallið.

Björgunarmenn eru nú á leið gangandi að búðunum frá næsta bæ en það er um dagsleið og þeir ekki væntanlegir á staðinn fyrr en á morgun.