Um 15.000 heimili eru án rafmagns í Portúgal eftir sögulegt óveður sem skall á landinu í gærkvöldi. Það var fellibylurinn Leslie sem herjaði á mið- og norðurhluta landsins. Sterkur vindur og mikil úrkoma fylgdi Leslie. Svo öflugt óveður hefur ekki skollið á Portúgal síðan á nítjándu öld.

BBC segir að mörg hundruð tré hafi brotnað eða rifnað upp með rótum, 15.000 heimili séu án rafmagns og samgöngur séu í lamasessi á áhrifasvæði Leslie. Engar fréttir hafa borist af manntjóni eða líkamstjóni. Yfirvöld höfðu varað fólk við veðrinu og hvöttu fólk til að halda sig innandyra og virðist fólk að mestu hafa farið eftir því.

Vindhraðinn mældist allt að 176 km/klst. Leslie er nú á leið til Spánar og mun herja þar í dag en hefur væntanlega veikst aðeins.

Mjög sjaldgæft er að fellibyljir nái alla leið til Evrópu en portúgalskir veðurfræðingar segja að það hafi aðeins gert fimm sinnum áður.