Flestir vita eflaust að rykmítlar (rykmaurar) hreiðra um sig í rúmum fólks enda er þar kjörlendi fyrir þessi litlu dýr. Ekki er þó þar með sagt að rykmítlar séu í milljónatali í rúmum fólks, að minnsta kosti ekki hér á landi. Hér á landi eru almennt slæm lífsskilyrði fyrir rykmítla þar sem kuldi og þurrt loft setja mark sitt á veður en rykmítlar dafna best í raka og hita.

Þetta þýðir auðvitað að þeir kunna vel við sig í rúmum fólks enda er oft heitt þar og rakt. Ekki bætir úr skák ef fólk skiptir sjaldan um á rúmum sínum eða þrífur svefnherbergin ekki oft. Það er því góð regla að skipta á rúmum vikulega og oftar ef þörf krefur. Einnig er gott að þrífa svefnherbergin reglulega því þannig er hægt að draga úr fjölda rykmítla og annarra óæskilegra dýra í svefnherberginu.

Á Vísindavef Háskóla Íslands kemur fram að lengi hafi því verið trúað að rykmítlar lifðu á húðflögum og væru algengir í rúmum og teppum landsmanna, til dæmis í svefnherbergjum. Nú hefur verið sýnt fram á að svo er ekki. Rannsóknir Thorkil Hallas, sem er danskur mítlafræðingur, hér á landi sýna að lítið er um rykmítla hér á landi. Hann telur að rykmítlar fjölgi sér ekki innanhúss hér á landi og séu frekar sjaldgæfir. Hann telur að þau fáu dýr sem honum tókst að fanga og rannsaka hafi borist utan frá eins og annað ryk.

Það ætti því ekki að vera mikil ástæða til að hafa áhyggjur af rykmítlum í svefnherbergjum landsmanna.