Í nýrri skýrslu frá The National Academies of Sciences, Engineering and Medicine er hnýtt í bandarísku geimferðastofnunina NASA fyrir að hafa ekki lagað sig að nýjum tímum í leit sinni að lífi utan jarðarinnar. Í skýrslunni kemur fram að NASA ætti að betrumbæta leitaraðferðir sínar með því að miða við breiðara litróf lífmynsturs og umhverfis og ekki síst nýta sér geimlíffræði við rannsóknir framtíðarinnar.

Í skýrslunni eru einnig nefnd til sögunnar ýmsar beinar aðgerðir sem NASA gæti gripið til í þessu verkefni, allt frá því að rannsaka höf á öðrum plánetum til þess að skoða lífið á jörðinni betur.

„Það er bráðnauðsynlegt að vera víðsýnni og nota þróaðri aðferðir til að finna líf, sem svipar að grunni til til lífsins eins og við þekkjum það, eða ný lífsform.“

Segir í skýrslunni sem beinir sjónum sínum að stórum hluta að möguleikanum á að finna líf undir yfirborði annarra pláneta.