Mikil hætta er á að mjög alvarleg hungursneyð stefni lífi milljóna íbúa Jemens í hættu á næstu mánuðum. Þetta segir Lise Grande, mannréttindafulltrúi Sameinuðu þjóðanna í Jemen. Versta hungursneyð í hundrað ár gæti verið yfirvofandi ef Sádar láta ekki af loftárásum á landið.
Lise segir að líf tólf til þrettán milljóna íbúa sé í bráðri hættu. Varar hún við að miklar hörmungar gætu orðið í landinu á næstu þremur mánuðum.
„Ég held að býsna mörg okkar hafi talið það óhugsandi þegar við gengum inn í 21. öldina að álíka hungursneyð myndi endurtaka sig og átti sér stað í Eþíópíu, Bengal og í hlutum Sovétríkjanna á sínum tíma – það þótti algjörlega óboðlegt. Mörg okkar höfðu þá trú að þetta myndi aldrei endurtaka sig, en raunin er sú að við stöndum frammi fyrir þessari ógn í Jemen,“ segir Lise.
Borgarastyrjöld hefur geysað í Jemen frá árinu 2015 og hafa áhrifin á almenning verið gríðarleg. Minnst tíu þúsund óbreyttir borgarar hafa fallið og milljónir hafa þurft að yfirgefa heimili sín.
„Það er engin spurning að við ættum að skammast okkar,“ segir Lise og á þar við sinnuleysi yfirvalda um allan heim að bregðast við þessari stöðu. Þessi ummæli lét hún falla skömmu eftir að hersveitir Sáda gerðu loftárás skammt frá hafnarborginni Hodeidah með þeim afleiðingum að fimmtán létust.