Ófögur sjón blasti við viðbragðsaðilum í Riverdale, úthverfi Atlanta í Bandaríkjunum, á dögunum. Harður þriggja bíla árekstur virtist hafa orðið og var ung kona, ökumaður Mözdu 626-bifreiðar, flutt alvarlega slösuð á sjúkrahús.
Konunni var haldið sofandi í öndunarvél fyrst um sinn en á miðvikudag í síðustu viku lést hún af áverkum sínum.
Konan sem um ræðir var 28 ára og hét Kelsey Quayle. Kelsey þessi hafði meðal annars starfað sem fyrirsæta og flutti hún til Atlanta fyrir tveimur mánuðum til að sinna því áhugamáli sínu af fullum þunga. Eftir að hún var flutt á sjúkrahús tóku læknar eftir því að skotsár var á hálsi hennar. Telur lögreglan fullvíst að hún hafi verið skotin áður en áreksturinn varð en svo virðist sem hún hafi misst stjórn á ökutæki sínu og ekið framan á tvær bifreiðar sem komu á móti.
Þennan örlagaríka dag var Kelsey á leið í vinnuna. Hún starfaði á skrifstofu tannlæknis í Riverdale samhliða fyrirsætustörfum sínum og segir systir hennar í samtali við ABC News að fjölskyldan sé miður sín vegna málsins og raunar engu nær um hver hafi skotið hana.
Lögregla hefur lagt mikinn þunga í rannsókn málsins síðustu daga og lýst eftir hugsanlegum vitnum að slysinu og því sem gerðist áður en áreksturinn varð. Enn sem komið er hefur enginn verið handtekinn vegna málsins.