Þrjátíu og fjögurra ára Breti, Marc Sutton, var skotinn til bana í Frönsku Ölpunum um helgina. Sutton þessi rak eigin veitingastað í Les Gets en hann var á reiðhjóli á laugardagskvöld þegar hann var skotinn.

Í frétt Independent kemur fram að 22 ára karlmaður, sem var við veiðar á svæðinu, hafi skotið Sutton á laugardagskvöld. Svo virðist vera sem um skelfilegt slys hafi verið að ræða og var veiðimanninum veitt áfallahjálp í kjölfarið.

Slysið var skammt frá skíðasvæðinu í Montriond og var Sutton á fjallahjóli á skógi vöxnu svæði. Maðurinn sem ber ábyrgð á dauða Suttons á yfir höfði sér ákæru og fangelsisdóm vegna málsins.

Þetta er ekki fyrsta dauðsfallið af svipuðum toga á þessum slóðum. Á síðasta ári var 59 ára fjallgöngumaður skotinn til bana af veiðimanni á villisvínaveiðum. Þá var þrettán ára piltur skotinn til bana af afa sínum á síðasta ári, en þeir voru saman á veiðum þegar slysið varð.