Claire Busby, 46 ára bresk kona, hefur höfðað mál gegn fyrirtæki sem framleiðir rúm eftir skelfilegt slys á heimili sínu.
Þannig er mál með vexti að Claire og maður hennar keyptu sér rúm árið 2013 sem framleitt var af Berkshire Bed Company. Kvöld eitt þegar Claire og maður hennar voru að stunda kynlíf kastaðist Claire úr rúminu með þeim afleiðingum að hún lamaðist.
Þau höfðu aðeins notað rúmið í eina viku og vill Claire meina að galli í hönnun rúmsins hafi valdið slysinu. Í frétt BBC kemur fram að Claire hafi setið klofvega yfir manni sínum þegar hún ætlaði að færa sig. Ekki vildi betur til en svo að hún datt aftur fyrir sig, kastaðist úr rúminu og lenti illa. Afleiðingar slyssins voru þær að hún lamaðist.
Maður Claire sagði fyrir dómi að hann hefði hlegið þegar Claire sagðist ekki geta hreyft útlimi sína. Hann hafi talið hana vera að grínast en þó áttað sig á alvarleika málsins skömmu síðar. Claire segir að botn rúmsins hafi verið gallaður, hæðarmunur hafi verið á fótum og rekja megi slysið til þess.
Framleiðendur rúmsins hafa hafnað ábyrgð á slysinu og því kom málið til kasta dómstóla.