Ástralski stórleikarinn Geoffrey Rush varð óglatt þegar hann las grein um sig í ástralska blaðinu Daily Telegraph fyrir skemmstu. Rush hefur stefnt blaðinu vegna meiðyrða en í greininni var fjallað um meinta óviðeigandi hegðun hans í garð samleikara.
Málið er nú til meðferðar hjá áströlskum dómstólum og má í raun segja að það tengist #MeToo-byltingunni. Meint óviðeigandi hegðun Rush á að hafa átt sér stað meðan á sýningum Lér konungs stóð og var hann sakaður um að hafa káfað á samleikkonu sinni, Eryn Jean Norvill. Rush hefur neitað því að hafa gert eitthvað óeðlilegt.
Rush lýsti því að hann hafi verið eyðilagður þegar hann las greinina einn morgun í nóvember á síðasta ári. Eiginkona hans og sonur hafi verið heima og þeim hafi, eðli málsins samkvæmt, verið verulega brugðið. „Mér leið eins og einhver hefði hellt blýi inn í höfuðið á mér. Ég hugsaði að þetta gæti ekki verið að gerast.“
Rush sagði að síðustu ellefu mánuðir hefðu verið þeir erfiðustu í lífi hans. Greinarnar í Telegraph hefðu rústað flekklausum ferli hans. Sydney Theatre Company gaf út yfirlýsingu í nóvember í fyrra þar sem staðfest var að leikhúsinu hefðu borist kvörtun vegna Rush árið 2015. Rush sagðist ekki hafa frétt af þeirri kvörtun, ekki fyrr en hann las um hana á síðum ástralska blaðsins.
Geoffrey Rush á að baki farsælan feril í leiklistinni og vann hann til að mynda til Óskarsverðlauna sem besti leikarinn í aðahlutverki fyrir myndina Shine árið 1997. Þá hefur hann þrisvar verið tilnefndur til Óskarsverðlauna fyrir leik sinn, síðast árið 2011 fyrir aukahlutverk í myndinni The King‘s Speech.
