Óvenjulegt atvik átti sér stað í Uttar Pradesh-héraði á Indlandi á dögunum þegar 72 ára karlmaður, Dharampal Singh að nafni, lést eftir árás apa.
Í frétt Times of India kemur fram að Singh hafi verið að safna við í skóglendi í Tikri þegar aparnir hófu að grýta manninn með grjóti. Aparnir voru uppi í tré og virðast þeir hafa safnað grjótinu saman áður en þeir grýttu manninn. Hann fékk grjóthnullunga í höfuðið meðal annars og lést af sárum sínum á sjúkrahúsi.
Íbúar í nágrenninu eru sagðir hafa kvartað undan öpunum og árásargirni þeirra áður en lögregla segist ekki geta gert neitt í málinu þar sem aparnir eru friðaðir.
