Fyrir viku hófst umfangsmikil rannsókn lögreglunnar í Barron í Wisconsin í Bandaríkjunum á morðunum á Denise og James Closs, 46 og 56 ára, sem voru skotin til bana á heimili sínu í Barron. Þegar lögreglumenn komu á vettvang var dóttir þeirra, Jayme Closs sem er 13 ára, á bak og burt. Hún er ekki grunuð í málinu en lögreglan telur að hún hafi verið numin á brott. Útidyr heimilis fjölskyldunnar höfðu verið skotnar í sundur til að morðinginn eða morðingjarnir kæmust inn.

Rannsóknin er umfangsmikil og alríkislögreglan FBI vinnur einnig að henni. Málið er umtalaðasta sakamálið í Bandaríkjunum þessa dagana og leitað er að Jayme um allt land. Rúmlega 100 lögreglumenn frá FBI vinna að rannsókn málsins. Um 1.200 ábendingar hafa borist frá almenningi. Mörg hundruð manns hafa verið yfirheyrðir og lögreglan hefur leitað víða þar sem grunur hefur verið um að Jayme kynni að vera. Chris Fitzgerald, lögreglustjóri í Barron, segir að lögreglan leggi allt í sölurnar til að finna Jayme og telji að hún „sé á lífi en í hættu”. Lögreglan telur að brottnám hennar hafi verið ástæðan fyrir því að foreldrar hennar voru myrtir.

Lögreglan hefur birt upptöku af símtali til neyðarlínunnar úr farsíma Denise Closs þegar morðin voru framin. Síminn var þá í húsi fjölskyldunnar. Enginn talar í símann en í bakgrunninum heyrast örvæntingarfull öskur og hróp. Neyðarlínan hringdi strax aftur í síma Denise til að fá meiri upplýsingar en ekki var svarað. Lögreglumenn voru einnig strax sendir á vettvang.

Á fréttamannafundi fyrir helgi sagði Chris Fitzgerald að Jayme hefði síðast sést með foreldrum sínum á fjölskyldusamkomu nokkrum klukkustundum áður en foreldrar hennar voru myrtir og hún numin á brott.

„Jayme er einhversstaðar þarna úti. Við ætlum að gera allt sem í okkar valdi stendur til að finna hana. Það er stærsta og mikilvægasta verkefni okkar.“