Danska ríkisútvarpið skýrir frá þessu. Fram kemur að þetta sé í fyrsta sinn sem vísindamenn sýna fram á að gæði sæðis minnki mikið, þegar karlar eldast, hjá þeim sem eru fyrir með lélegt sæði.
„Áður töldum við að gæði sæðis héldust óbreytt en það lítur út fyrir að þau minnki með tímanum þannig að á endanum geti karlar ekki getið börn.“
Hefur Danska ríkisútvarpið eftir Niels Jørgensen yfirlækni á frjósemisdeild ríkissjúkrahússins.
„15 prósent ungra karla eru með svo lélegt sæði að þeir geta ekki getið börn nema fá frjósemismeðferð. Í heildina er sæði 40% danskra karla svo lélegt að það hefur neikvæð áhrif á möguleika þeirra á að eignast börn.“
Sagði Jørgensen sem var skýr í orðum hvað varðar ráðleggingar til karlmanna:
„Ef þú ert með mjög lélegt sæði eru miklar líkur á að það verði fljótlega enn lélegra. Ef þú vilt eignast börn ættir þú því að fá aðstoð á frjósemisdeild.“
Rannsóknin náði til 137 heilbrigðra karla á aldrinum 33 til 48 ára.
Vísindamennirnir telja að orsök lélegra gæða sæðis sé að finna í hormónatruflandi efnum sem eru allt í kringum okkur í umhverfinu. Þau hafi mikil áhrif á drengi á meðan þeir eru í móðurkviði og þá raski þessi efni þroska eistnanna. Það sé því ekki lífsstíl karla um að kenna að sæðið sé svona lélegt.
Jørgensen sagði að þar sem þetta gerist í móðurkviði sé lítið sem hægt sé að gera við þessu nema hvað yfirvöld verði að grípa inn í og herða lög og reglur um notkun þessara efna.
