Jacob mætti á umræddan stað á tilsettum tíma. Þegar þangað var komið réðst eiginkonan á hann og naut aðstoðar bróður síns við árásina. Þau lömdu Jacob, spörkuðu í hann og grýttu segir í umfjöllun Expressen. Síðan bættist tengdamóðir hans í hópinn og tók þátt í ofbeldinu.
Á myndum má sjá hversu illa útleikinn Jacob var eftir árásina sem var mjög ofbeldisfull og hættuleg.
Málið kom nýlega fyrir dóm og voru eiginkonan, sem nú er fyrrverandi eiginkona Jacob, bróðir hennar og móðir sakfelld fyrir líkamsárás og morðtilraun. Þau voru sakfelld fyrir að „hafa í sameiningu skipulagt morð“. Eiginkonan fyrrverandi var dæmd í 4 ára fangelsi fyrir grófa líkamsárás. Bróðir hennar var dæmdur í 9 ára fangelsi fyrir morðtilraun og móðir þeirra í 7 ára fangelsi fyrir morðtilraun.
Ástæðan fyrir mildari dómi yfir eiginkonunni fyrrverandi er að dómurinn taldi ekki sannað að hún hefði tekið þátt þegar bróðir hennar og móðir reyndu að berja Jacob til dauða með plastkassa.
Eiginkonan fyrrverandi var ósátt við dóminn og sagði að hún hafi ekki verið á staðnum þegar ráðist var á Jacob og að hann hefði raunar ráðist á hana við húsið í skóginum. Hún sagði að hann hefði hrint henni svo harkalega að hún hefði dottið og lent á hnakkanum.
„Mér sortnaði fyrir augum í nokkrar sekúndur. Þegar ég gat staðið upp aftur sá ég að Jacob og bróðir minn voru að slást. Ég reyndi að skilja þá að en Jacob sagði mér að skipta mér ekki af þessu. Bróðir minn sagði að ég skyldi koma mér í burtu og það gerði ég.“
Sagði eiginkonan fyrrverandi í samtali við Expressen.
Dómnum fannst þetta ekki trúverðugt og benti á að lýsing Jacob á atburðarrásinni hafi fallið vel að niðurstöðum rannsóknar lögreglunnar en Jacob vissi ekki um niðurstöðurnar þegar hann gaf skýrslu hjá lögreglunni.
Eiginkonan fyrrverandi vildi láta reyna á málið fyrir æðra dómsstigi en hæstiréttur hafnaði að taka það fyrir og stendur dómurinn því óhaggaður.
