Viktoríuvatn er eitt stærsta vatn Afríku en á henni stendur eyjan Migingo. Enginn veit í raun hvaða landi Migingo tilheyrir, en bæði Kenía og Úganda hafa gert tilkall til hennar.

Eyjan er agnarsmá, minni en fótboltavöllur í fullri stærð, en þrátt fyrir það heimili um 500 íbúa, að því er talið er.

Eins og meðfylgjandi myndir bera með sér er byggð afar þétt á henni og hver fermetri nýttur til fulls. Þess má til gamans geta að fyrsta húsið, eða kofinn, eftir því hvernig á það er litið, reis á eyjunni árið 2002 og síðan þá hefur þeim fjölgað ört.

Atvinnuvegur íbúa eyjarinnar eru fiskveiðar eins og kannski gefur að skilja. Þó að eyjan sé lítil búa íbúar ekki við neinn skort. Fjórir barir eru á henni, hárgreiðslustofa og vændishús, að því er fram kemur í nýlegri grein sem birtist á vef breska blaðsins Mirror. Þröngar götur liggja á milli húsanna og íbúar virðast lifa þarna í sátt og samlyndi þó svo að tvær þjóðir berjist um yfirráðin yfir eyjunni.

Migingo stendur í raun á landamærum Úganda og Kenía og eru íbúar eyjunnar frá báðum löndum. Deilurnar um eyjuna hafa stundum verið kallaðar „minnsta stríð Afríku“ en nú stendur til að útkljá deiluna í eitt skipti fyrir öll.

Nefnd sem skipuð verður fulltrúum beggja ríkja er ætlað það hlutverk að ákveða nákvæmlega hvar landamærin eru og hvar eyjan stendur með tilliti til þeirra. Þegar þeirri vinnu lýkur ætti niðurstaða að fást í málið.