Nauðganir og barnaníð eru glæpir og það sama gildir um að borða kjötbollur, kótilettur og hakkabuff. Þetta er megininntakið í boðskap sem stjórnmálaflokkur danskra veganista setti nýlega fram á Facebooksíðu sinni. Þar var kjötát borið saman við barnaníð og annað ofbeldi gegn börnum eins og kemur fram í inngangi þessarar fréttar. Með þessu er flokkurinn að færa rök fyrir að kjötneysla sé í raun óviðeigandi og röng, eins og barnaníð.
„Við heyrum oft þá skoðun að af því að einhver vill gera þetta, borða kjöt, þá eigum við ekki að skipta okkur af því. En siðferði er ekki huglægt og bæði barnaníð og kjötát er siðferðislega rangt.“
Sagði Michael Monberg, einn stofnanda flokksins, í samtali við BT. Hann viðurkenndi að það væri „á brúninni“ að nota barnaníð til samanburðar en til að beina sjónum fólks að kjötáti, sem flokkurinn telur óviðurkvæmilegt, sé réttlætanlegt að bera það saman við barnaníð.
„Veganflokkurinn er lítilmagninn núna. Við berjumst fyrir málstað þeirra sem mega sín allra minnst, dýranna. Þegar maður berst fyrir slíkan málstað, þar sem maður er langt að baki öðrum, verður maður stundum að nota orð sem vekja athygli fólks. Ég held að þetta sé samanburður sem fær kannski einhverja til að hugsa sig um.“
Sagði Monberg og lagði áherslu á að flokkurinn vilji ekki jafna barnaníði við kjötát.
„Við segjum ekki að það að borða kjöt sé það sama og að stunda barnaníð. Það er ekki það sem við viljum segja. En í báðum tilfellum er fórnarlamb.“
