54 ára þýskur karlmaður hefur verið dæmdur í 12 ára fangelsi fyrir að hafa sett eitur í barnamat sem var seldur í nokkrum stórmörkuðum. Fimm krukkum, með eitruðum barnamat, var komið fyrir í hillum nokkurra stórmarkaða í Ravenburg á síðasta ári. Í hverri krukku var ethylenglycol, sem er litarlaust og eitrað efni, í nægilegu magni til að verða barni að bana. En sem betur fór ekki svo illa að börn létust af völdum eitursins.

Maðurinn var handtekinn á síðasta ári og í gær var hann dæmdur í tólf og hálfs árs fangelsi fyrir fimm morðtilraunir og tilraun til fjárkúgunar.

Eftir að hann hafði komið barnamatnum fyrir í verslununum setti hann sig í samband við verslanirnar og krafðist 11,7 milljóna evra fyrir að hætta að koma eitruðum barnamat fyrir í verslunum.

Maðurinn játaði fljótt að hafa reynt að kúga fé út úr verslununum en hefur staðfastlega neitað að hafa ætlað að myrða einhvern.

Peter Vobiller, saksóknari, sagði fyrir dómi að það væri öflugri rannsóknarvinnu og ”einnig stórum skammti af heppni, ef hann ætti að vera hreinskilinn,” að þakka að engin börn létust af völdum eitursins.

Maðurinn hefur skýrt framferði sitt með að hann hafi drukkið mikið af áfengi og tekið verkjalyf og þjáist af geðtruflunum sem fái hann til að gera hluti án nokkurrar umhugsunar. Geðlæknum tókst hins vegar ekki að finna nein merki um geðtruflanir hjá manninum en segja hins vegar að hann sé ”gríðarlega sjálfselskur”.