Frumkvöðullinn Elon Musk hefur tilkynnt að fyrstu háhraðagöngin muni opna í desember næstkomandi. Musk hefur boðað þessa tækni á undanförnum árum en um að ræða göng fyrir lestir sem geta náð allt að þúsund kílómetra hraða.
Göngin sem Musk vísar til og opna í desember eru þó tilraunagöng og eru þau rúmir þrír kílómetrar að lengd. Þau liggja undir höfuðstöðvum SpaceX í Hawthorne í Kaliforníu og verður almennilegi boðið að prófa göngin til að sjá hvernig þau virka. Til stendur að hafa opnunarhátíð þann 10. desember næstkomandi.
Lestarnar í umræddum göngum ná ekki ýkja miklum hraða – enda tiltölulega stutt í samanburði við önnur – en farþegar geta þó átt von á að ná um 200 kílómetra hraða.
Hyperloop-tæknin er eflaust eitthvað sem koma skal því brátt stendur til að prófa hana í bænum Salo í Finnlandi. Eru vonir gerðar til þess að slíkt kerfi verði tekið í notkun víðar á Norðurlöndunum í kjölfarið.
Elon Musk hefur stundum verið gagnrýndur fyrir að standa ekki við það sem hann segir, að minnsta kosti hvað varðar dag- og tímasetningar. Þegar hann var spurður á Twitter hvort 10. desember væri Musk-tími eða alvöru tími svaraði hann að bragði: „Alvöru tími, held ég.“