Í fréttatilkynningu frá safninu, sem var send út í gær, kemur fram að nú hafi rannsókn utanaðkomandi sérfræðinga staðfest að fimm af þessum 16 hlutum séu falsaðir og verði því ekki lengur til sýnis á safninu.
Haft er eftir Jeffrey Kloha, forverðir á safninu, að þrátt fyrir að starfsfólk safnsins hafi vonast til að niðurstaðan yrði önnur þá veiti hún tækifæri til að fræða almenning um hversu mikilvægt það er að staðfesta hvort sjaldgæfir biblíutengdir munir séu í raun ekta.
Safnið vill ekki segja hversu mikið það greiddi fyrir þessi 16 handritabrot en samkvæmt frétt CNN seljast svipaðir hlutir á rúmlega eina milljón dollara stykkið.
Þetta er ekki í fyrsta sinn sem uppruni þessara sögulega handrita er dreginn í efa. Á síðasta ári skýrðu norskir vísindamenn frá því að fölsuð Dauðahafshandrit væru í umferð og að þau væru seld fyrir svimandi háar upphæðir.
Frá 2002 hafa 70 nýir hlutar af handritunum komið fram á sjónarsviðið en norsku vísindamennirnir segja að 90 prósent þeirra séu fölsuð.
Dauðahafshandritin samanstanda af um 900 trúarlegum textum um gyðingatrú og menningu og voru skrifaðar á árunum 270 fyrir krist og 70 eftir krist. Meðal innihaldsins eru textar úr Gamla testamentinu. Handritin fundust á milli 1947 og 1956 í 11 hellum á Qumransvæðinu við Dauðahafið. Handritin hafa gegnt stóru hlutverki við rannsóknir á elstu formum gyðingdóms og biblíunni.