Í Chengdu í Kína er dimmt, of dimmt. Að minnsta kosti að mati Wu Chunfeng sem býr í þessari milljónaborg í suðvesturhluta landsins. Það væri þá kannski ráð að nota ljósastaura til að lýsa borgina upp en það er ekki það sem Chunfeng hefur í huga. Hann ætlar að byggja tungl, á borð við tunglið sem blasir öðru hvoru við okkur á himninum, og senda á braut um jörðina.

Þetta nýja tungl á að endurkasta sólarljósi til Chengdu og þannig lýsa borgina upp að næturlagi. Ætlunin er að tunglið fari á braut um jörðina eftir tvö ár. Það á ekki að keppa við sólina um styrkleika en hann á að vera á borð við birtuna sem ræður ríkjum þegar sólin er að setjast. Nýja tunglið á að vera viðbót við hið hefðbundna og náttúrulega tunglsljós. Peoples Daily skýrir frá þessu.

Chenfeng, sem er forstjóri geimferðafyrirtækisins CASC sem er stærsti framleiðandi tæknilausna fyrir kínversku geimferðaáætlunina, segir að nýja tunglið eigi að lýsa upp 10-80 ferkílómetra svæði. Það á að vera hægt að stýra birtunni frá því með mikilli nákvæmni og styrkurinn á að vera átta sinnum meiri en styrkur náttúrlega tunglsins og því verður óþarfi að nota ljósastaura og aðra götulýsingu.