Þetta á rætur að rekja til þingkosninganna sem fara fram í Bandaríkjunum 6. nóvember. Cruz berst þar fyrir sæti sínu í öldungadeildinni en hann er þingmaður Texas og tekst á við helstu vonarstjörnu demókrata, Beto O‘Rourke. Cruz nýtur stuðnings Trump í þessari baráttu og í gær mætti Trump á kosningafund í Houston í Texas til að lofsama Cruz og hvetja kjósendur til að kjósa hann.
Samskipti þeirra voru öllu vinsamlegri en í baráttunni fyrir tveimur árum þegar Trump sagði Cruz vera lygara, að eiginkona hans væri ekki eins falleg og Melania (eiginkona Trump) og Cruz kallaði Trump sjúklegan lygara. Þess utan blés Trump lífi í þær samsæriskenningaglæður sem segja að faðir Ted Cruz hafi skotið John F. Kennedy til bana fyrir rúmlega hálfri öld síðan.
Eftir að Trump tryggði sér sigur í forvalinu neitaði Cruz að styðja hann. En tvö ár eru langur tími í bandarískum stjórnmálum og í gær fór Trump til Texas til að styðja við bakið á Cruz.
„Lygarinn Ted? Nei, núna heitir hann fallegi Ted. Ég kalla hann Texas Ted.“
Sagði Trump léttur í lund við fréttamenn þegar hann yfirgaf Hvíta húsið í gær á leið til Texas. Að sjálfsögðu tók Cruz á móti Trump á flugvellinum í Houston enda þarfnast þeir félagar hvors annars þessa dagana. Cruz vill halda þingsæti sínu og Trump vill koma í veg fyrir að demókratar nái meirihluta í þinginu.
