Það getur tekið sinn toll að koma hjálparvana fólki til bjargar en Leonid Schepel, búsettur í Rússlandi, fann fyrir þessu. Hann hlaut á dögunum sekt þegar hann stöðvaði mann í annarlegu ástandi sem hafði ráðist á konu á níræðisaldri.

Fréttamiðillinn Central European News greinir frá þessu og segir þar að árásarmaðurinn hafi verið undir áhrifum áfengis og ekkert látið eftir í atgöngunni. Samkvæmt yfirlýsingu lögreglu taldi árásarmaðurinn sér trú um að hin 88 ára gamla Klara Melamed hafi brotist inn til hans.

Leonid er sagður hafa verið staddur á svölum íbúðar sinnar þegar hann heyrði öskur konunnar og ákvað að kanna málið. „Ég sótti myndavélina til að sjá hvað væri í gangi,“ segir Leonid. Þá kom hann að árásarmanninum sem hafði ítrekað lamið Klöru, sem leiddi til mikilla tannskemmda og brotinna rifbeina auk þess að handleggur hennar fór úr lið.

Að neðan má sjá skjáskot úr myndbandinu sem Leonid tók þegar atvikið átti sér stað.

Í kjölfar þessarar björgunaraðgerðar hlaut Leonid sekt frá rússneska ríkinu fyrir að koma höggi á árásarmanninn. Sektin hljómaði upp á 5 þúsund rússneskar rúblur, sem samsvara tæpum 8 þúsund íslenskum krónum. Árásarmaðurinn var úrskurðaður í gæsluvarðhald hjá lögreglu.

„Ég sé ekki eftir því sem ég gerði,“ segir Leonid og telur sig sælan með að hafa getað veitt Klöru aðstoðina sem þurfti. „Líf hennar og dauði er mér mikilvægara en peningar.“