Hvernig myndi þér líða ef þú myndir vinna einn stærsta lottópott sögunnar, eða 190 milljarða króna? Bandaríkjamenn munu margir hverjir eflaust bíða spenntir eftir útdrætti kvöldsins í Mega Millions-lottóinu en 1,6 milljarðar Bandaríkjadala, um 190 milljarðar króna, eru í pottinum.
Um er að ræða stærsta lottópott Bandaríkjanna frá upphafi en potturinn í Powerball-lottóinu árið 2016 var 1,586 milljarðar dala.
Þó margir munu eflaust bíða spenntir eru líkurnar á vinningi ekki ýkja miklar og raunar eru talsverðar líkur á því að potturinn gangi ekki út í kvöld.
Líkurnar á hitta á rétta röð eru 1 á móti 302,5 milljónum. Það þýðir að allar mögulegar raðir í lottóinu eru 302,5 milljónir. Síðastliðinn föstudag höfðu 59 prósent þeirra verið seldar og er búist við því að talan fari í 75 prósent áður en lokað verður fyrir sölu í kvöld. Það eru því um fjórðungslíkur, eða þar um bil, á því að potturinn gangi ekki út.
Ef einn heppinn einstaklingur verður með allar tölurnar réttar getur hann valið um að fá eingreiðslu eða upphæðina greidda út yfir ákveðið tímabil. Ef viðkomandi velur fyrri kostinn þarf hann að gera sér að góðu að borga dágóða summu til bandaríska ríkisins. Þá fengi hann 904 milljónir dala, eða rúmlega 108 milljarða króna.
