Það má svo sannarlega segja að ólánið hafi skollið af fullum þunga á Henrik Kriegbaum í ágúst. Kvöld eitt ætlaði hann að færa köttinn sinn sem var fyrir honum. Kettinum brá og beit Henrik í vísifingurinn.

„Ég var svo óheppinn að hann beit í æð. Þetta gerðist klukkan 22. Ég vaknaði klukkan 2 um nóttina næstum öskrandi af sársauka. Það var eins og höndin væri að springa og hún var orðin tvöföld að stærð.“

Henrik fékk síðan hita og bólgan hélt áfram að aukast. Hann fór því til læknis um morguninn og var strax sendur á sjúkrahúsið í Vejle á Jótlandi en Henrik býr á Jótlandi.

„Ég fór í fimm aðgerðir á einum mánuði. En það gerði ekkert gagn. Það verður að taka fingurinn af mér.“

Sagði hann í samtali við Danska ríkisútvarpið.

„Fingurinn skaddaðist svo mikið að hann er orðinn alveg stífur. Liðurinn er svo illa farinn að ég get ekki hreyft fingurinn. Það er sýking eftir kattabitið sem veldur þessu.“

Hann glímir einnig við vanda í tengslum við skynjun líkamans á hita og kulda vegna áhrifa bitsins á taugar líkamans. Hann hefur losað sig við köttinn.