Tvær systur fundust látnar í Hudson-fljótinu í New York-fylki í síðustu viku. Í fyrstu var lögreglan engu nær um hverjar systurnar voru en síðar kom í ljós að þær hétu Rotana og Tala Farea og voru 22 og 16 ára gamlar.
Lögregla hefur rannsakað málið undanfarna daga en virðist engu nær um það hvað varð til þess að stúlkurnar hlutu jafn sorgleg örlög.
Rotana og Tala voru frá Sádi-Arabíu og höfðu þær sótt eftir hæli í Bandaríkjunum. Þær voru búsettar í Fairfax í Virginíuríki og komu fyrst til Bandaríkjanna árið 2015.
Að sögn New York Daily News höfðu stúlkurnar átt það til að hlaupast á brott og gerðu þær það ekki alls fyrir löngu þegar í ljós kom að senda átti fjölskylduna, þar á meðal tvo bræður þeirra, aftur til Sádi-Arabíu.
Það að stúlkurnar hafi verið bundnar saman með límbandi vekur ákveðnar grunsemdir lögreglu, en enn sem komið er vill lögreglan ekkert segja til um það hvort um morð eða sjálfsvíg hafi verið að ræða. „Það eina sem við vitum er að hér átti sér stað mikill harmleikur,“ segir Dermot F. Shea, yfirmaður rannsóknardeildar lögreglunnar í New York.
„Þær áttu aldrei í útistöðum við neinn og tilheyrðu hamingjusamri fjölskyldu,“ segir aðstandandi stúlknanna í samtali við Arab News. Hann segist ekki hafa neina trú á því að stúlkurnar hafi ákveðið að svipta sig lífi og ýjar að því að þær hafi verið myrtar.