Í síðustu viku var karlmaður á sextugsaldri handtekinn á landamærum Noregs og Svíþjóðar þegar hann reyndi að smygla 170.000 sígarettum til Noregs. Tollvörðum fannst eitthvað grunsamlegt við sendiferðabílinn sem maðurinn ók en hann sagðist aðspurður ekki vera með neitt tollskylt í bílnum.

Sendiferðabíllinn hafði verið útbúinn þannig að tvöfaldar dyr voru á honum að aftan en það var gert til að ekki sæist inn í bílinn. En hins vegar hafði smyglarinn klikkað á einu smáatriði, sem er nú eiginlega ekki smáatriði, því hann hafði ekki byrgt fyrir útsýnið inn i vörurýmið þegar horft var inn í bílinn að framan. Sígarettukartonin blöstu því við tollvörðunum þegar þeir ræddu við ökumanninn.

Bílstjórinn var úrskurðaður í gæsluvarðhald þar til 2. nóvember. Þetta er með stærri sígarettusmyglmálum sem norskir tollverðir hafa komið upp um að undanförnu.