Eftir níu ára starf úti í geimnum fyrir bandarísku geimferðastofnunina NASA er sjónaukinn Kepler nú farinn á eftirlaun. Hann á það líklega skilið enda hefur hann gert margar tímamótauppgötvanir. Hann fann 2.662 plánetur og sýndi fram á að það eru fleiri plánetur en stjörnur í Vetrarbrautinni.

Kepler hefur lagt 150 milljónir kílómetra að baki í geimnum, verið beint að 530.506 stjörnum og 2.946 vísindagreinar hafa verið birtar á grunni upplýsinga frá honum. En nú er þessu lokið því eldsneyti hans er á þrotum og því hefur verið ákveðið að hann fari á eftirlaun.

Kepler hefur markað nýja stefnu í geimrannsóknum, stefnu sem næsta kynslóð vísindamanna mun án efa fylgja að sögn Williams Borucki, fyrrverandi starfsmanns NASA, sem var einn af aðalhugmyndasmiðunum á bak við Kepler.