Í nótt var Anna Britta Troelsgaard Nielsen handtekin í íbúð í Jóhannesarborg í Suður-Afríku. Hún var eftirlýst fyrir meintan fjárdrátt úr sjóðum danska félagsmálaráðuneytisins. Talið er að hún hafi dregið sér 111 milljónir danskra króna, hið minnsta, úr sjóðum ætluðum þeim verst settu í samfélaginu, þetta svarar til um 2.000 milljóna íslenskra króna. Fjárdrátturinn stóð yfir árum saman.

Efnahagsbrotadeild dönsku lögreglunnar skýrði frá því fyrir nokkrum mínútum að Anna Britta hefði verið handtekinn klukkan 5.30 í nótt og hafi danskir lögreglumenn verið viðstaddir handtökuna.

Anna Britta lét sig hverfa úr landi skömmu áður en upp komst um fjárdráttinn og hefur farið huldu höfði síðan. Sjónir lögreglunnar beindust fljótlega að Suður-Afríku en þar hafði Anna oft dvalið og á þar meðal annars búgarð sem talið er að hafi verið keyptur fyrir illa fengið fé.

Í síðustu viku var meintur samverkamaður hennar handtekinn í Suður-Afríku þegar hann ætlaði úr landi. Hann er grunaður um að hafa aðstoðað Önnu við að koma peningunum undan.