Tíðni húðkrabbameins hefur aukist talsvert meðal karla í þróuðum ríkjum á undanförnum árum. Tíðnin hjá konum hefur aftur á móti staðið í stað eða lækkað í sumum ríkjum.

Þetta er meðal þess sem kom fram á ráðstefnu Alþjóðakrabbameinsstofnunarinnar (NCRI) sem haldin var í Glasgow um helgina. Breska blaðið Guardian fjallaði um þessar tölur.

Í átta ríkjum af átján sem skoðuð voru hefur tíðni húðkrabbameins aukist um 50 prósent að jafnaði á síðustu þrjátíu árum. Tíðnin hefur tvöfaldast í Írlandi og Króatíu, aukist um 70 prósent á Spáni og Bretlandi og 60 prósent í Hollandi. Í Belgíu og Frakklandi var aukningin 50 prósent.

Orsök húðkrabbameina er oftar en ekki útfjólublá geislun og segja sérfræðingar að hluta aukningarinnar hjá körlum megi rekja til þess að þeir eru síður líklegir en konur til að nota sólarvörn.