Niðurstaða nýrrar rannsóknar vísindamanna við háskólann í Bristol á Englandi bendir til að 40 til 48% prósent minni líkur séu á að árrisular konur fái brjóstakrabbamein. Rannsóknin er byggð á gögnum um heilsufar mörg hundruð þúsund kvenna. Í henni kemur einnig fram að orsakatengsl séu á milli þess að sofa lengur á morgnana og brjóstakrabbameins.

Sky skýrir frá þessu. Fram kemur að hjá konum, sem sváfu lengur en 7 til 8 klukkustundir á nóttu, hafi líkurnar á að greinast með brjóstakrabbamein aukist um 20% á hverja aukaklukkustund sem þær sváfu. Mælt er með 7 til 8 klukkustunda nætursvefni fyrir fullorðna að sögn Sky.

Vísindamennirnir segja að erfðir ráði því hvort fólk er morgunhanar sem vakni yfirleitt snemma og fari snemma að sofa eða hvort það sé frekar eins og næturhrafnar sem eru þreyttir á morgnana en njóta sín betur á kvöldin. Rebecca Richmond, sem stýrði rannsókninni, segir að vísindamennirnir vilji gjarnan rannsaka þetta betur. Það sé ekki sjálfgefið að það að breyta svefnvenjum sínum dragi úr líkum á brjóstakrabbameini, þetta geti verið mun flóknara en það.