Bandarískur karlmaður, Chris Watts, játaði á þriðjudag að hafa drepið ólétta eiginkonu sína og tvö ung börn þeirra. Morðin framdi Watts í ágústmánuði síðastliðnum.
Óhætt er að segja að málið hafi vakið óhug hjá mörgum enda voru börn þeirra hjóna, dæturnar Bella og Celeste aðeins þriggja og fjögurra ára. Eiginkona Watts, Shanann, var 34 ára og komin fimmtán vikur á leið með þeirra þriðja barn.
Málið er nú fyrir dómi í Colorado í Bandaríkjunum og hefur Watts játað að hafa drepið fjölskyldu sína. Í staðinn munu saksóknarar ekki fara fram á dauðadóm yfir Watts. Mun hann þess í stað fá lífstíðardóm án möguleika á reynslulausn.
Watts kom fram í sjónvarpsviðtölum í sumar þar sem hann lýsti yfir áhyggjum af fjölskyldu sinni. Þetta var aðeins tveimur dögum eftir að hann myrti fjölskyldu sína með köldu blóði.