Nýlega beið maður í hjólastól eftir strætó í úthverfi Parísar. Maðurinn, Francois Le Berre, er með mænusigg, oftast kallað MS, og þarf að nota hjólastól. Þegar strætisvagninn kom neituðu farþegarnir í vagninum að færa sig þannig að Francois kæmist inn. Þetta fór að vonum illa í vagnstjórann sem greip til sinna ráða og hefur hann verið hylltur á samfélagsmiðlum fyrir það sem hann gerði.

Í tísti frá hópi sem kallar sig „Accessible Pour Tours“ (Aðgengi fyrir alla) var skýrt frá þessu fyrir hönd Francois. Þar segir að vagnstjórinn hafi gert sér lítið fyrir og rekið alla farþegana út úr vagninum. Hann aðstoðaði síðan Francois við að komast inn í vagninn og ók síðan á brott með hann einan innanborðs.

Að jafnaði eru eitt eða tvö pláss fyrir hjólastóla í strætisvögnum í París og eiga farþegar að veita fötluðum forgang og víkja fyrir þeim þegar þeir ætla að nota strætó.

Færsla Accessible Pour Tours var eitthvað á þessa leið:

„Þegar ég beið eftir strætó í París í gær vildi enginn færa sig. Þar sem enginn hreyfði sig til að ég kæmist inn stóð vagnstjórinn upp og sagði: „Ferðin endar hér! Allir út!“ Síðan kom hann til mín og sagði: „þú mátt fara um borð en þið hin bíðið eftir næsta vagni!““

Færslan hefur vakið mikla athygli og margir hafa deilt henni og tjáð sig um hana. Flestir hafa hrósað vagnstjóranum og skammast út í farþegana. En þó hafa nokkrir bent á að fólk eigi að hafa í huga að það hefði heldur ekki fært sig ef það hefði verið í vagninum.