Rúmlega tvö hundruð fjöldagrafir sem innihalda lík 6-12 þúsund einstaklinga hafa fundist í Írak undanfarin misseri. Grafirnar eru frá þeim tíma og á svæðum sem ISIS stjórnaði á sínum tíma.
Þetta kemur fram í skýrslu Sameinuðu þjóðanna, en hópur rannsakenda hefur verið að störfum á svæðum sem voru undir stjórn ISIS. Alls hafa 202 fjöldagrafir fundist í norðurhluta Íraks.
Talið er að þeir sem drepnir voru og liggja í fjöldagröfunum hafi látist á árunum 2014 til 2017. ISIS hlífði fáum og myrti til dæmis liðsmenn öryggissveita og minnihlutahópa. Þá voru þeir drepnir sem fylgdu ekki fyrirmælum liðsmanna ISIS.
Írösk yfirvöld lýstu yfir sigri í baráttunni við ISIS í desember í fyrra en ljóst er að mikil vinna er fyrir höndum að bera kennsl á þá látnu.
