Rúmlega 2.000 manns hafa í nótt leitað að 12 ára dreng með þroskahömlun á stóru svæði í Falkenberg sem er um 15 km sunnan við Gautaborg í Svíþjóð. Drengurinn, sem heitir Dante, fór út að viðra hundinn sinn síðdegis á þriðjudaginn en skilaði sér ekki heim aftur. Hundurinn fannst seinna um kvöldið en hvorki hefur fundist tangur né tetur af Dante.

Lögreglan heldur öllum möguleikum opnum við rannsókn málsins og hóf á miðvikudaginn rannsókn á hvort Dante hefði verið rænt. Frá því í gær hefur leitin að miklu leyti beinst að ánni Ätran og hafa kafarar verið þar að störfum. Í gærkvöldi ákvað lögreglan að láta lækka vatnsyfirborðið í ánni til að auðvelda köfurum störf sín.

Aftonbladet hefur eftir Tommy Nyman, talsmanni lögreglunnar, að talið sé að Dante sé á Falkenbergsvæðinu. Lögreglan heldur leit áfram af fullum krafti og segist ekki hafa neinar áætlanir um að draga úr henni.