15 ára unglingspiltur hefur verið ákærður fyrir morð að yfirlögðu ráði. Lögregla telur að hann hafi kyrkt móður sína og fengið vini sína til að hjálpa sér við að grafa lík hennar. Voðaverkið var framið í kjölfar rifrildis um slakar einkunnir sonarins.

Atburðurinn átti sér stað í Florida. Hin látna er Gail Cleavenger, 46 ára gömul. Mæðginin deildu vegna þess að drengurinn hafði fengið D í einkunn í skólanum. Deilurnar urðu ákafari og enduðu með dauða móðurinnar. Eiginmaður hennar og faðir drengsins var á viðskiptaferðalagi er átökin áttu sér stað, en þetta gerðist síðastliðið fimmtudagskvöld.

Drengurinn reyndi að láta líta út fyrir að innbrot hefði átt sér stað á heimilinu og hann fékk vini sína til að hylma yfir glæpinn með sér, meðal annars með því að grafa lík móðurinnar í nágrenninu.

Nánar segir frá málinu á Huffington Post.