En auglýsingin er aðgengileg á netinu og bann Clearcast hefur kannski bara vakið meiri athygli á henni en annars. Að minnsta kosti hafa milljónir manna horft á auglýsinguna nú þegar og stöðugt bætist við þá tölu. Auglýsingin náði aldrei augum sjónvarpsáhorfenda því ekki var byrjað að sýna hana þegar Clearcast bannað sýningar hennar.
Það er leikkonan Emma Thompson sem talar inn á auglýsinguna en það voru umhverfisverndarsamtökin Greenpeace sem gerðu hana. Hún átti að vera jólaauglýsing Iceland þetta árið.
Í auglýsingunni segir litli órangútan apinn, sem er í aðalhlutverki, að heimkynni hans hafi verið eyðilögð af mönnum. Stórar gröfur sjást fella tré til að hægt sé að gróðursetja olíupálma. Pálmaolía er einmitt aðalumfjöllunarefni myndarinnar en Iceland stærir sig einmitt af að vilja hætta notkun pálmaolíu fyrir árslok. Þess vegna samdi fyrirtækið við Greenpeace, sem berst gegn notkun pálmaolíu, um að fá að nota þessa mynd Greenpeace sem jólaauglýsingu.
En það er einmitt aðkoma Greenpeace sem er ástæðan fyrir banninu að sögn Clearcast því stofnunin skilgreinir Greenpeace sem pólitísk samtök en sýning pólitískra auglýsinga er bönnuð í bresku sjónvarpi.
En eins og áður sagði er bannið líklegast eitt það besta sem gat komið fyrir auglýsinguna, Iceland og Greenpeace því kastljós fjölmiðla hefur svo sannarlega beinst að henni fyrir vikið og milljónir manna hafa horft á hana.
