South China Morning Post skýrir frá þessu.
Ekki minnkuðu áhyggjur og grunsemdir kennaranna og annarra vegna málsins en skólastjórinn virtist vera sá eini sem tók þessu öllu af ró. Hljóðið var mjög þreytandi en því var lýst sem einhverskonar suði, eins og frá viftu eða einhverju raftæki. Starfsfólkið fór því að leita að upptökum hljóðsins og á endanum rakti það upptökin til tölvurýmis skólans. Þar var allt með felldu með tölvur skólans en við blasti að níu tölvum hafði verið bætt við í tölvurýminu. Þær voru notaðar til að grafa eftir rafmynt en slíkur gröftur er orkufrekur og krefst sérstaks tölvubúnaðar. BBC skýrir frá.
Það getur verið mikið upp úr þessu að hafa enda eru margar rafmyntir verðmiklar. Það fylgir því einnig mikill kostnaður að koma sér upp búnaði til að leita að rafmynt en skólastjórinn keypti sér fyrstu tölvuna til þessa í júní 2017 að sögn South China Morning Post. Síðan bætti hann við búnaðinn og var að lokum kominn með 8 tölvur sem sáu um gröftinn. Hann hefur væntanlega ætlað að halda rekstrarkostnaðinum í lágmarki með því að staðsetja búnaðinn í skólanum og láta hann greiða rafmagnsreikninginn.
BBC segir að skólastjórinn hafi þó ekki verið einn að verki því aðstoðarskólameistarinn hafi einnig tekið þátt í þessu en hann var bara með eina tölvu. Auk þess að nota rafmagn skólans notuðu tölvurnar einnig netkerfið og hægðu verulega á netsambandi skólans og truflaði það kennsluna.
Ekki þarf að koma á óvart að skólastjóranum hefur verið vikið frá störfum en aðstoðarskólastjórinn slapp með skrekkinn og fékk aðvörun. Þá hafa yfirvöld gert fjárhagslegan ávinning skólastjóranna af greftrinum upptækan.