74 ára karlmaður lést í árásinni og tveir til viðbótar særðust. Þegar lögreglumenn reyndu að stöðva Ali réðst hann að þeim með hníf á lofti og reyndi ítrekað að stinga þá. Rogers var staddur nærri og kom hann lögreglumönnunum til aðstoðar. Hann tók tóma innkaupakerru og reyndi ítrekað að aka henni á Ali.
Í samtali við dagblaðið The Age sagði hann að hann hafi „verið skyndiákvörðun“.
„Ég vildi bara hjálpa og gera eitthvað rétt í fyrsta sinn í lífinu.“
Sagði hann. Í samtali við Channel Seven lýsti hann atburðarásinni:
„Ég var búinn að sjá innkaupakerruna og sótti hana því og hljóp og ók henni á hann. Ég hitti hann en það dugði ekki til að fella hann til jarðar. Ég gerði þetta aftur og aftur en mér tókst bara ekki að koma honum niður á jörðina.“
Þetta gerðist í aðeins nokkurra metra fjarlægð frá brennandi bílnum. Vegfarendur tóku atburðarásina upp og hefur upptökunum verið deilt á samfélagsmiðlum og fljótlega fékk Rogers viðurnefnið „Innkaupakerrumaðurinn“.
Rogers hefur ekki alltaf verið réttu megin við lögin og sagði hann áströlskum fjölmiðlum að hann hann hafi verið inn og út úr fangelsum undanfarinn áratug og hafi barist við fíkniefnadjöfulinn. Hann er heimilislaus.
Góðhjartaðir samborgarar hans hafa því hafið fjársöfnun handa honum til að hægt sé að tryggja honum húsaskjól. Í gær höfðu safnast sem nemur um 10 milljónum íslenskum krónum.
Ali, sem var frá Sómalíu, var skotinn til bana af lögreglunni. Hann var þekktur hjá lögreglunni og leyniþjónustunni vegna tengsla hans við hryðjuverkasamtök.