Ríkisstjóri Norður-Karólínu hefur heitið tuttugu þúsund Bandaríkjadölum, jafnvirði rúmlega tveggja milljóna króna, fyrir upplýsingar sem leiða til þess að þrettán ára stúlka, Hania Aguilar, finnist heil á húfi.
Það var í síðustu að stúlkunni var rænt við heimili sitt í Lumberton. Hún hafði brugðið sér út til að setja bifreið frænku sinnar í gang, en frænka hennar ætlaði að skutla henni á strætóstoppistöð í nágrenninu.
Í þann mund sem stúlkan steig upp í bílinn kom maður á pallbíl upp að henni. Dró hann hana inn í bílinn og ók burt. Þessi sama bifreið fannst yfirgefin skammt frá.
Aðstandendur stúlkunnar hafa miklar áhyggjur enda eru nokkrir dagar liðnir síðan henni var rænt. Bandaríska alríkislögreglan, FBI, hefur málið nú til rannsóknar. Myndin hér að ofan var tekin aðeins einum degi áður en stúlkunni var rænt og hefur henni verið dreift til íbúa í nágrenninu.
Þá hafa íbúar verið hvattir til að kanna nærumhverfi sitt og láta vita ef þeir verða varir við grunsamlegar mannaferðir.