Breski herinn býr sig nú undir útgöngu Breta úr ESB í mars á næsta ári ef samningar nást ekki á milli Bretlands og ESB. Tobias Ellwood, varnarmálaráðherra, segir að herinn vinni nú hörðum höndum að undirbúningi áætlana um hvernig á að bregðast við ef samningar nást ekki.

Ellwood segist vilja að herinn sé undir allt búinn þegar að útgöngunni kemur, hvort sem samningar nást eða ekki. Þetta sagði hann í sjónvarpsþættinum Ridge on Sunday. Hann sagði að viðbragðsáætlanir verði gerðar og rætt verði innan hersins hvernig hann styðji best við Bretland þegar að útgöngunni kemur. Um praktískan stuðning verði að ræða.

Ýmsar sögur hafa verið í gangi um hlutverk hersins við útgönguna. The Sunday Times hefur til dæmis sagt að herinn muni vinna með borgaralegum yfirvöldum við dreifingu lyfja og matvæla á svæðum sem erfitt er að ná til þar sem reiknað sé með að vöruflutningar fari úr skorðum þegar Brexit tekur gildi.

Þessu hefur talsmaður forsætisráðherrans, Theresa May, vísað á bug og sagt að engar áætlanir hafi verið gerðar um að nota herinn ef samningar nást ekki.