Þetta sagði Bengt Johansen í samtali við TV2 en dömubindanotkun hans hefur vakið mikla athygli í Noregi undanfarið. Fyrrnefnt ráð um að hafa dömubindi með fékk hann fyrir nokkrum áratugum síðan þegar hann var í skíðaferð með vinum sínum. Hann segir þetta ráð hafa breytt miklu á ferðalögum hans.
Dömubindi eru eins og kunnugt er hönnuð til að drekka í sig vökva, blóð og aðra líkamsvökva sem fylgja blæðingum kvenna.
„Ég tek eftir því að fólk fær glettnisglampa í augun þegar maður gengur um með dömubindi í skónum. En þetta er eitthvað sem ég nota á praktískan hátt. Þau gagnast ótrúlega vel við að halda fótunum þurrum.“
Sagði Bengt sem segir dömubindi vera það besta til að halda fótunum þurrum.
„Þau eru svo rakadræg að þau eru fullkomin til að halda fótunum þurrum þegar maður er á ferðinni. Það er þó rétt að benda á að þetta gildir að sjálfsögðu um hrein bindi. Notuð bindi koma líklega ekki að sama gagni.“
Blæðir þér mikið?
Í samtali við TV2 lýsti hann fyrsta skiptinu sem hann keypti dömubindi. Þegar hann bað afgreiðslukonuna um bindi með mestu rakadrægninni og stærstu vængjunum spurði hún hann hvort honum blæddi mikið.
„Ég hló þegar hún spurði hvort mér blæddi mikið. En stutt útskýring á að ég þyrfti að nota bindin í skóna mína skýrði málið fyrir henni.“
Hann segir að allir ferðafélagar hans noti dömubindi í skóna. Til að vekja athygli á þessum notkunarmöguleika birti hann nýlega upptöku á Facebook þar sem hann skýrði frá þessu. Það hefur vakið mikla athygli og tugir þúsunda hafa horft á það.
