Allt frá því að þýski ökuþórinn Michael Schumacher lenti í alvarlegu skíðaslysi milli jóla og nýárs árið 2013 hefur lítið frést af líðan hans.

Schumacher, sem er 49 ára, hlaut alvarlega höfuðáverka í slysinu og var um tíma tvísýnt hvort hann myndi lifa slysið af. Hann lá í dái í nokkra mánuði en undanfarin misseri hefur hann verið í endurhæfingu á heimili sínu og fjölskyldu sinnar við Genfarvatn í Sviss. Fullyrt hefur verið að fimmtán manna teymi hugsi um hann.

Mail Online greinir í dag frá því að eiginkona Schumacher, Corinna, hafi skrifað bréf um líðan eiginmanns til þýska tónlistarmannsins Sascha Herchenbach eftir að sá síðarnefndi samdi sálm til heiðurs Michael.

Í því segir Corinna meðal annars að Michael sé „baráttujaxl“ sem muni „ekki gefast upp“. Ekki liggur fyrir hvenær bréfið var skrifað en Sascha samdi umræddan sálm um það bil ári eftir að Schumacher lenti í slysinu.

Sascha sagði frá bréfinu í viðtali við þýska blaðið Bunte. Sagði hann að Corinna hafi þakkað honum fyrir stuðninginn sem skipti fjölskylduna miklu máli. Corinna hefur aldrei tjáð sig opinberlega um líðan Schumacher eða batahorfur hans. Um það leyti sem Schumacher var útskrifaður af sjúkrahúsi hvatti hún fólk til að hugsa hlýlega til hans en sagði jafnframt að hún myndi ekki tjá sig frekar um stöðu mála.

Í umfjöllun Bunte fyrir um ári síðan kom fram að Schumacher ætti sína góðu og slæmu daga. Ekki var greint nákvæmlega frá líðan hans en þó kom fram að Schumacher virtist afslappaður og líða vel í örmum þeirra sem standa honum næst. Hann geti átt í einhverjum samskiptum við þá sem þekkja hann vel.Fjölskylduvinur sem Bunte ræddi við sagði að Schumacher hefði það gott miðað við aðstæður. Hann njóti góðs af því í dag að hafa verið afreksíþróttamaður í fremstu röð í mörg ár.

Corinna og Michael hafa staðið saman í gegnum súrt og sætt en þau gengu í hjónaband árið 1995. Michael Schumacher var um tíma einn vinsælasti íþróttamaður heims og margfaldur heimsmeistari í Formúlu 1.