En salernið er ekki ætlað Gates eða fjölskyldu hans heldur er þróun þess og smíði eitt af þeim mannúðarverkefnum sem hann veitir fjármunum til. Í síðustu viku tók Gates þátt í Reinvented Toilet ráðstefnunni í Peking í Kína. Þar steig hann í pontu og hafði með sér krukku með mannasaur.
Hann ræddi um vandann við nútímaklósett og sagði frá nýja klósettinu en það drepur sjúkdómsvaldandi bakteríur. Áhugi hans á þessu vaknaði fyrir um 10 árum þegar hann og eiginkona hans, Melinda, byrjuðu að ferðast vítt og breitt um heiminn.
„Ég hef heimsótt lönd þar sem börnin leika í skurðum fullum af mannasaur, salernin eru tæmd með höndunum, þar sem lyktin frá salernunum er svo slæm að fólk vill ekki nota þau og fólk drekkur vatn mengað með mannasaur. Fyrir tíu árum hefði ég aldrei trúað að ég myndi vita svona mikið um mannasaur og ég var nokkuð viss um að Melinda myndi aldrei þurfa að stoppa mig í að ræða um salerni við matarborðið.“
Sagði Gates úr ræðustól.
Hann segir að árlega látist 500.000 börn um allan heim af völdum niðurgangs, kóleru og taugaveiki.
Þau salerni sem notuð eru í dag senda úrganginn frá sér með því að vatn skolar honum niður. En í mörgum fátækum ríkjum eru salernin ekki tengd við frárennsliskerfi og það er sá vandi sem Gates vill leysa.
Tæknin í hinu nýja salerni Gates gerir að verkum að salernið tekur saurinn og drepur sjúkdómsvaldandi bakteríur. Ekki þarf að tengja salernið við frárennsliskerfi og því hentar það vel í fátækum löndum. Gates líkir þessu verkefni við það þegar hann var að byrja með Microsoft. Þá höfðu fáir efni á að eignast tölvu og grín var gert að þeim draumi hans að gera tölvur að almannaeign en í dag er það Gates sem getur hlegið að þeim sem hlógu að honum á sínum tíma.
