Skelfileg alda ofbeldis og morða hefur verið í Lundúnum undanfarna mánuði. Það sem af er ári hafa 118 verið myrtir í borginni en það eru jafn margir og voru myrtir þar allt síðasta ár samkvæmt tölum frá Innanríkisráðuneytinu. Inni í þessum tölum eru ekki 13 fórnarlömb hryðjuverkaárása sem voru gerðar í borginni á síðasta ári.

Sky skýrir frá þessu. Fram kemur að samkvæmt tölum lögreglunnar hafi 120 verið myrtir á árinu en inni í þeirri tölu eru tvö mál þar sem talið er að um sjálfsvörn hafi verið að ræða.

68 hafa verið stungnir til bana, 12 skotnir og tveir skotnir og stungnir. Í þriðjungi málanna voru fórnarlömbin á aldrinum 16 til 24 ára, 20 voru á unglingsaldri. Af fórnarlömbunum á aldrinum 16 til 24 ára voru 30 stungin, níu voru skotin, tvö voru skotin og stungin og eitt hrapaði til bana. Af unglingunum voru sex skotnir og 14 stungnir.

111 morð voru framin í borginni 2016 og 122 árinu á undan. Þar á undan hafði morðum farið fækkandi frá 2007 en þá voru þau 164 og voru komin niður í 91 2014.